RwandaSport.com | Sport News, Fixtures, Results, table, scorers

Rayon Sports irashaka gutwara Yannick wamaze gusinyira POLICE FC

Tora iyi nkuru
(1 :Inshuro yatowe)
Yannick ni rutahizamu watunguye benshi bakurikirana umupira w'amaguru mu Rwanda Yannick ni rutahizamu watunguye benshi bakurikirana umupira w'amaguru mu Rwanda Photo: IGIHE

Izina Bizimana Yannick ryatunguye benshi mu bakunzi ba ruhago nyarwanda cyane cyane abakurikiye Shampiyona y’umwaka ushize wa 2018-2019, aho uyu musore w’imyaka 22 gusa yayisoje afite ibitego 14 mu ikipe nka AS Muhanga yarangirije ku mwanya wa cyenda ku rutonde rwa Shampiyona.

Bizimana wari ukinnye umwaka wa mbere mu cyiciro cya mbere hamwe n’ikipe ye nyuma yo gutungura benshi, kubona izamu si inkuru nshya kuri we dore ko yazamukanye n’ikipe ye nyuma yo kuyitsindira ibitego 14 mu mwaka wabanje mu cyiciro cya kabiri.

Yerekeje muri AS Muhanga mu mwaka wa 2017-18 nyuma yo gutizwa na Gitikinyoni FC yo mu cyiciro cya kabiri, yarangije shampiyona abengutswe n’amakipe menshi akomeye ahatanira ibikombe ndetse akanahanganira ku isoko ry’abakinnyi, cyane cyane ayo mu Mujyi wa Kigali.

 

Ku ikubitiro haje ikipe ya APR FC 

Nyuma yo gutsindirwa i Muhanga ibitego 2-1 bitsinzwe n’uyu rutahizamu wenyine mu mukino wa shampiyona, amakuru agera kuri IGIHE ni uko nyuma y’uyu mukino bamwe mu bayobozi b’iyi kipe y’ingabo z’igihugu begereye uyu musore wari usigaje imikino ibiri ari yo uwa Gicumbi FC ndetse na Espoir FC ngo Shampiyona igere ku ndunduro, bamusaba ko yabasinyira imbanzirizamasezerano ngo azabakinire mu mwaka utaha w’imikino.

Ibiganiro byabereye mu Mujyi wa Muhanga ntacyo byaje kugeraho dore ko uyu musore we yifuza kubona ikipe yabonamo umwanya uhoraho wo gukina ndetse abanzamo.

Nk’umukinnyi ntiyifuzaga guhatanira umwanya na bamwe mu bakinnyi b’ibihangane muri iyi kipe nka Hakizimana Muhadjiri, Sugira Ernest, Danny Usengimana, Bigirimana Issa, Nshuti Innocent tutibagiwe na Mugunga Yves.

 

Uburyo Bizimana Yannick yasinyiye Police FC 

Ku wa Gatandatu tariki ya 8 Kamena, nibwo byari ngombwa ko abayobozi b’ikipe ya Police FC bahura n’uyu musore mu Mujyi wa Kigali bakaganira uburyo yakwerekeza muri iyi kipe y’abashinzwe umutekano, gusa Yannick akaba yaratinze kubona ubutumwa bugufi bw’Umunyamabanga w’iyi kipe bwamwohererejwe kuri telefoni igendanwa, biba ngombwa ko bahura ku munsi wakurikiyeho wo ku Cyumweru, ari nabwo yasinye imbanzirizamasezerano y’imyaka ibiri nyuma yo guhabwa miliyoni 2.5 Frw ndetse n’umushahara w’ibihumbi 300 Frw nk’uko amakuru agera kuri IGIHE abyemeza.

N’ubwo Police FC yasinyishije uyu mukinnyi izi neza ko agifite umwaka umwe usigaye ku masezerano afitanye na AS Muhanga ndetse nta n’urupapuro rumurekura (release letter) irahabwa, yizeye ko izaganira n’impande zombi yaba iyi kipe itozwa na Abdou Mbarushimana kuko ari yo igomba kubaha urwo rupapuro ndetse na Gitikinyoni FC igomba guhabwa amafaranga y’indezo nk’ikipe yakuriyemo, maze bikarangira uyu musore bamwegukanye.

 

AS Muhanga yaciye iyo hasi irifuza kumugurisha muri Rayon Sports 

Bizimana ni umukinnyi wa AS Muhanga ndetse wanashyize umukono ku masezerano y’imyaka ibiri akinira iyi kipe mbere y’uko Shampiyona y’umwaka ushize itangira, bisobanuye ko asigaje umwaka umwe.

Muri aya masezerano harimo ingingo ivuga ko ikipe yose izifuza uyu musore, izabanza kuganira na Gitikinyoni maze akaba ari yo igenerwa 15% buri mwaka uyu rutahizamu yaba asigaje ku masezerano hagendewe ku giciro azaba yatanzweho.

Nyuma yo kwishyura Bizimana miliyoni 2,5 Frw, Police FC yemera kwishyura ikipe ya Gitikinyoni miliyoni eshatu nk’indezo, maze na Gitikinyoni ikagenera AS Muhanga 15% byayo bingana n’umwaka uyu musore yari asigaje nk’uko bikubiye mu masezerano, bingana n’amafaranga ibihumbi 450 Frw, ibintu AS Muhanga idakozwa.

AS Muhanga biciye kuri Perezida Ndayisaba Damascène ndetse n’umutoza wayo Abdou Mbarushimana, bari mu biganiro rwihishwa na bamwe mu bayobozi ba Rayon Sports bifuza ko uyu ruyahizamu yakwerekeza muri Gikundiro mu gihe baba bishyuwe miliyoni eshanu bombi nk’ikiguzi cy’umwaka Yannick asigaranye muri iyi kipe, maze nabo bagaha Gikundiro urupapuro rumurekura (release letter).

Biravugwa ko ubuyobozi bwa AS Muhanga bwamenyesheje ikipe ya Gitikinyoni iby’ibiganiro buri kugirana na Rayon Sports n’ubwo umukinnyi we ntacyo aravugana na Gikundiro.

Amakuru ava muri bamwe mu nshuti z’uyu rutahizamu, avuga ko uyu musore atifuza kwerekeza mu ikipe ya Rayon Sports, izamushyira ku gitutu cyo gukina imikino nyafurika ndetse no guhatanira umwanya na ba rutahizamu bayo batyaye barimo Jules Ulimwengu warangije Shampiyona y’umwaka ushize ayoboye abandi mu kunyeganyeza inshundura n’ibitego 20, Umunya-Ghana Michael Sarpong waje umukurikiye n’ibitego 16 ndetse n’undi rutahizamu bazagura nyuma, uzasimbura umunya-Brésil Da Silva wasezerewe n’iyi kipe agasubira iwabo. Uyu musore akaba atewe impungenge n’uko ashobora kubura umwanya uhoraho muri iyi kipe.

Rayon Sports yifuza kongera amaraso mashya mu bakinnyi, nyuma yo gutwara igikombe cya Shampiyona ya 2018-2019, imaze gusinyisha imyaka ibiri abakinnyi babiri; myugariro Iragire Saidi yaguze muri Mukura Victory Sports ndetse n’Umunya-Ghana Olokwei Commodore yasinyishije nyuma yo gutsinda igeragezwa ry’ibyumweru bibiri. Uretse aba, hakaba hategerejwe na Kapiteni wa Mukura Victory Sports, Ciza Hussein biteganyijwe ko ashyira umukono ku masezerano y’imyaka ibiri kuri uyu wa Gatanu.

Nyuma yo gutwara igikombe cya Shampiyona, Rayon Sports izahagararira u Rwanda mu irushanwa ry’amakipe yabaye aya mbere mu bihugu byayo, CAF Champions League, ndetse ikomeje gukina n’Igikombe cy’Amahoro aho yatsinze Marines FC igitego 1-0 mu mukino ubanza wabereye kuri Stade Umuganda. Umukino wo kwishyura uzaba ku Cyumweru ku Kicukiro.

 

Inkuru ya IGIHE.COM

Iheruka gukosorwa
Moses Collon

Umwanditsi mukuru akaba n' umuyobozi w' ikinyamakuru RwandaSport.com cyandika ku makuru y' imikino mu Rwanda ndetse no hanze yarwo.

Musange kuri facebook, kuri twitter cyangwa wandike kuri email collon@rwandasport.com

@

Tanga Igitekerezo Cyawe

-------------------AMATEGEKO AGENGA IYANDIKA RY'IGITEKEREZO CYAWE HANO-----------------
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni. Igitekerezo cyawe kigaragara nyuma y'isuzuma rikorwa n' ababishinzwe kuri RWANDASPORT.com. Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

©2013 - 2019 RwandaSport.com. All right reserved.

InfoTimes LTD ntiyishingiye ibibera hanze y' urubuga rwacu biturutse ku nkuru cyangwa ibindi bikomoka ku mbuga zacu.

Top Desktop version