RwandaSport.com | Sport News, Fixtures, Results, table, scorers

Ikiganiro Perezida Kagame yagiranye n' umuyobozi wa FIFA Infantino

Tora iyi nkuru
(0 :Inshuro imaze gutorwa)
Ikiganiro Perezida Kagame yagiranye n' umuyobozi wa FIFA Infantino Photo: Village Urugwiro

Umuyobozi wa FIFA, Gianni Infantino, yagiranye ibiganiro na Perezida Paul Kagame byibanze ku guteza imbere umupira w’amaguru uhereye mu mashuri binyuze mu mushinga witwa ‘Football for schools’.

Kuri uyu wa Kane tariki 25 Ukwakira 2018 aba bayobozi bahuye ubugira kabiri, baganira kuri byinshi byateza imbere umupira w’amaguru mu Rwanda no muri Afurika cyane ko Kagame ubu ari umuyobozi w’Umuryango wa Afurika yunze ubumwe.

Infantino yasabye Perezida Kagame ubufasha bwa za Guverinoma z’ibihugu bya Afurika mu guteza imbere umupira w’abana bari hagati y’imyaka itandatu na 16. Yemeza ko byoroshye kubategura kuko bahurira ku mashuri.

Mu kiganiro n’abanyamakuru kuri uyu wa Gatanu, Infantino yagize ati “Twaganiriye byinshi byateza imbere umupira w’amaguru hano. Iby’ingenzi navuga ni umushinga wa ‘Football for schools’ wo kuzamura urwego rw’ubushobozi bw’ibigo by’amashuri mu mupira w’amaguru ahantu hashobora kuva abana benshi bagira umwuga umupira.”

Mu gihe Isi ikomeje kwibasirwa n’ibitero by’ubugizi bwa nabi, ku bibuga nka hamwe mu hahurira abantu benshi ni hamwe mu hibasirwa.

Kimwe mu bitero biheruka byagabwe ku bibuga by’umupira w’amaguru ni icyabaye mu 2015 i Paris ubwo u Bufaransa bwakinaga n’u Budage. Cyaguyemo abantu bane barebaga uyu mukino.

Infantino yavuze ko yaganiriye na Perezida Kagame ku bijyanye no gukaza ingamba zo gucunga umutekano ku bibuga hirindwa ko ibitero nk’ibi byaba.

Ati “Ni ukongera imbaraga n’ubushobozi mu gucunga umutekano kuko igihe tugezemo si icyo kumva umubare w’abantu runaka bapfiriye ku bibuga by’umupira kubera umutekano mucye.”

Aba bayobozi bombi kandi bemeranyije ko hakwiye ubufatanye mu kurwanya ruswa n’ibindi bihabanye n’amategeko bikirangwa mu mupira w’amaguru muri Afurika, ahatanzwe urugero ku bihugu bya Ghana na Sierra Leone.

Uyu muyobozi ari mu Rwanda ku nshuro ya gatatu mu ruzinduko rw’iminsi itatu, yitabiriye Inama y’Ubuyobozi Bukuru bwa FIFA izasozwa kuri uyu wa 27 Ukwakira.

 

Iheruka gukosorwa
Moses Collon

Umwanditsi mukuru akaba n' umuyobozi w' ikinyamakuru RwandaSport.com cyandika ku makuru y' imikino mu Rwanda ndetse no hanze yarwo.

Musange kuri facebook, kuri twitter cyangwa wandike kuri email collon@rwandasport.com

@

Tanga Igitekerezo Cyawe

-------------------AMATEGEKO AGENGA IYANDIKA RY'IGITEKEREZO CYAWE HANO-----------------
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni. Igitekerezo cyawe kigaragara nyuma y'isuzuma rikorwa n' ababishinzwe kuri RWANDASPORT.com. Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

©2013 - 2019 RwandaSport.com. All right reserved.

InfoTimes LTD ntiyishingiye ibibera hanze y' urubuga rwacu biturutse ku nkuru cyangwa ibindi bikomoka ku mbuga zacu.

Top Desktop version